بسم الله الرحمن الرحيم
عام كامل مر عليا وأنا مشترك فى منتدى مصر..كان لازم أعمل مع نفسى وقفة واشوف ال365 يوم دول كانو ايه فى حياتى ..هل كان المنتدى يستحق منى كل الساعات اللى ضيعتها معاه ولا لأ...كل حاجة فى الدنيا دى ليها مميزات وليها عيوب..كذلك أنا ليا مميزات وليا عيوب ..كذلك المنتدى ..ليه مميزات وليه عيوب...هحاول أشوف العيوب والمميزات دى وأشوف إيه الأكتر وأحدد موقف المنتدى من حياتى ..هل هو ايجابى ولا سلبى ..
بداية العيوب
1- بيضيع وقت كتير جدااااااااااااا
2-معظمه عالم مزيف مليان بالمجاملات والنفاق
3-الجلوس قدام الكمبيوتر عموما لفترة طويلة بيضر بالصحة وبيسحب النظر
4-قليل قوى لما تلاقى واحد فعلا مشترك بشخصيته الحقيقية
5-معظم الصداقات بتبقى عشان المصلحة
6-معظم الموضوعات أصبحت تافهة
اما المميزات
1- تكوين صداقات حقيقية بالرغم من انها قليلة الا انها افضل المميزات
2- بيزود الثقافة العامة للانسان وبيقوى معلوماته العامة
3- التسلية والمرح وروح الحب بين الأعضاء
4-بيجمع ناس كتير جدااا من مختلف المحافظات..وده بيديك خبرة فى كيفية التعامل مع الناس باختلاف صفاتهم
5- مساعدة الأعضاء وخصوصا فى الأقسام العلمية ليها ثواب وأجر عند ربنا ..تخيل لو جبت كتاب و أفاد مثلا 20 واحد ..تخيل الثواب اللى هاتخده!
وفيه عيوب ومميزات كتير موجودة ..بس مش حاضرة فى دماغى دلوقتى..ده غير ان فيه أعضاء كتير كانت ليها بصمة فى المنتدى بس سابوه ..مصطفى محمود..بجملته المشهورةalf shokr ya basha
كيمو ..بشقاوته وخفة دمه ..جمال النجار..بذكائه وموضوعيته..بنت الكنانة ..بابداعاتها المتميزة..الدكتورة مها ..بجدعنتها الاسكندرانية ..نقيب بحرى ..بقوة موضوعاته ..جوفيدال..بمشاركتها المتميزة ..اسلام ..بطيبة قلبه ..الأسوانية ..بروحها الجميلة..وغيرهم من الاعضاء المميزين..يااه أنا فاكر الفترة اللى انا اشتركت فيها فى المنتدى ..كان حوالى عدد المشرفين حوالى 10 بس وكان على فكرة صبراوى نشيط جدااا وكان بيرد على معظم الموضوعات ..تخيلوا!وكان المدير هو هامو ..بس كان المنتدى صغنون وملموم..اما دلوقتى ..ماشاء الله بقى كبير وعدد الاعضاء الفعالين بقى اكتر من 3 أضعاف وبقى نشيط ..ودى طبعا بمجهود كل الاعضاء وخصوصا صبراوى واسامة ودعاء ..هما فعلا أساس المنتدى شايلين المنتدى على اكتافهم ..ربنا يوفقهم ...معلشى طولت عليكم ..لكن دى كانت فضفضة من القلب.. واعذرونى على صراحتى ..أن شاء الله الفترة الجاية أنا مسافر ..واحتمال غيابى يطول شوية ..ويمكن لما أرجع أبقى أدخل المنتدى تانى ..وممكن لأ..على حسب مراجعتى لنفسى ..على الارجح هاعمل زى كيمو ..هاغيب ووقت ماتوحشونى هارجع كام يوم ..أتمنى فعلا انى كنت خفيف عليكم فى المنتدى وياريت أى حد زعلته او ضايقته يسامحنى ....و رمضان كريم
رسايل خاصة
العندليب الأسمر...رابطة أدباء منتدى مصر...حلمى اللى كنت أتمنى يتحقق وانا معاكم ..بقى مسؤليتك لوحدك..ياريت تهتم بيه
أسامة صلاح...بالنسبة لفريق الفراعنة ..شوف أيمن ألفى ان كان هيكمل فيه ولا لا ..أنا منسحب من الفريق وبالتالى زميلى محمد (اللى كان عامل مشاكل )منسحب هو كمان ..لو أيمن عاوز يبقى فى الفريق لوحده ..براحته ..لو انتقل فريق تانى ...يبقى الفريق اتفكك وانسحب بالكامل
دعاء ..الاشراف كان فعلا شرف ليا ...لكن كان برضه مسؤلية ..اتمنى أكون كنت قد المسؤلية..أتمنى كمان أرجع مصرى مميز تانى ..
مباحث ...صديقى العزيز ...القسم الهندسى بقى مملكتك الآن ...ربنا يوفقك
خلاص كده ...خلصت كلامى ..ياريت كل واحد يعمل مع نفسه وقفة ويشوف هل مكانه صح ولا لأ
آه نسيت أقول ان القرار ده بكامل ارادتى والحمد لله مفيش أى مشاكل ليا مع حد .وعلى فكرة لو وحشت أى حد فيكم ممكن يبقى يطمن عليا من على الميل بتاعى ..hamada14u
على الياهو.و أخيرا ..شكرا لكل الأعضاء اللى اعتبرونى بجد صديق ..وكل الأعضاء اللى ساعدونى فى يوم من الأيام ..وسلامى المميز جداا لصبراوى وأسامة ودعاء والعندليب..من كل قلبى شكرا ليكم....وفى النهاية ..آسف على الإزعاج ..
المواضيع المتشابهه 
العرض العادي
