[الدكتورة مها]

السلام عليكم ورحمة الله وبركاته


دى قصة جميلة أوى قريتها وعجبتني واتمنى تنال اعجابكم

القصة مكونة من اجزاء

قصة قريتها وعجبتني وهيا قصة من نسج الخيال بس ممكن تحصل في الحياة ...

تخيلـوا معايـا

بنت جاية لأمها تقولها ان فى واحد متقدملى
أكيد ان امها بتفرح

بس المشكلة بقى بعد ما تسأل الأم بنتها :
عرفتيه من فين يا بنت ؟
ترد وتقول : من النت يا أمـي

طبعــا الأم ...

وخصوصا انها لا تفقه أى شىء فى الكمبيوتر
سوى أنه جهاز يلعب عليه الأولاد ...!!!!


تعالــوا نشوف عفـاف
وهيا بتقول لأمها ان فى عريس



تركت عفاف الكمبيوتر التي تقضى عليه معظم وقتها فجأة
وصرخت بصوت عالى
مااااما ..... يا ماماااااااااااااااا .....يا ماماااااااااااااااا

الأم : فيه إيه يابت بالراحة إخواتك نايمين
عفاف: معلش يا ماما أصلى فرحانة ....
فرحانة اوي اوي

الأم: خير يا بنتى فرحينى معكاي كدا ربنا يفرح قلبك

عفاف: عريس يا ماما عريس

الأم فرحة : يا ألف نهار أبيض يا ألف نهار مبروك

لولولولولولولولولولولولولولوى :


وبعد دقيقتين أحضان وقبلات تذكرت الأم

الأم: ألا قوليلى يابت
عريس مين دة اللي هيتقدملك
وماقلتليش من ساعة ما جيتى من الجامعة ليه ؟

عفاف: لأنى لسة عارفة دلوقتى حالا يا ماما

الأم بإستغراب: عارفة دلوقتى حالا؟؟؟؟؟؟

عارفة منين يابت دة انتى لسة قايمة دلوقتي من قدام الكبورر....

عفاف ضاحكة : كبورر ايه بس يا ست الكل
اسمه كمبيوتر

الأم:مش مهم
المهم عرفتيه ازاى ؟ ومين أصلا العريس دةيعنى جاى منين؟

عفاف:من النت يا ماما

ظلت الأم المسكينة تنظر لابنتها باستغراب
وهى تراجع كل ما تعرفه من كلمات
ولم تجد لكلمة النت أثر بينها

فسألت عفاف..........

الأم: النت ؟ ودى تبقى فين دى يا بت؟
عفاف: فين ازاى يا ماما؟
الأم: يعنى فينها من الوايلى الى احنا فيها؟

تركبيلها مترو ولا اتوبيس ولا تأخديها تاكسى
اوعى يابت يكونوا بيروحولها بالقطر؟

عفاف ضاحكة : ايه يا ماما الى انت بتقوليه دة؟
مترو إيه وقطر إيه؟! دة النت

الأم: أيوة يا بنتى عرفنا انه الزفت
بس دة موقعه فى انه بلد بالظبط ؟

عفاف:فى كل البلاد يا ماما

الأم باستغراب : انتى اتهبلتى يا بت؟
يعنى إيه فى كل البلاد؟

عفاف: يا ماما النت دة عبارة عن كمبيوترات كتير
في العالم وفيه معلومات كتير اوى

الأم:معلومات ايه يابت انتى
هو انتى هتتجوزى دايرة المعارف؟؟؟؟؟؟

عفاف:المهم يا ماما ان فى واحد متقدملى عن طريق النت

الأم: ودة اتقدم ازاى يعنى؟؟؟؟؟

عفاف: بعتلى إيميل

الأم فى ذهول: ايميل؟
بعتلك إيميل جارنا المسيحى؟

وإزاى يا بت تقبلى تتكلمى مع الى اسمه إيميل ده
وهو مين عشان الزفت بتاعك ده يبعته لينا!!!!!

عفاف فى سرها طب افهمها ازاى دى بقىىىى ؟؟؟

عفاف:يا ماما اهدى إيميل جارنا مين بس ...!

الأم: مش انتى الى بتقولى يابت

عفاف:إيميل يعنى جواب بس على النت

الأم: برضه هتقوليلي عالزفت
يابنتى أنا مش فاهمة البتاع الى بتتكلمي عليه دة

عفاف:النت دة ياماما حاجة فى الكمبيوتر
ممكن نبعت فيها رسائل لناس برة
ونستقبل منهم رسائل برضه دة غير حاجات كتير

الأم:أنا ماليش فى الكلام دة
اللي انا عايزة أعرفه هو مين ومعاه شهادة ولا لأ ؟
واصله ايه وفصله ايه ؟؟

عفاف:هو اسمه حاتم
وطالب فى هندسة حاسبات و قاطعتها الأم

طالب؟؟؟؟؟؟؟؟؟؟

عفاف: أيوة ياماما بس فى آخر سنة
الأم : بصى أنا ماليش دعوة بالموضوع دا أنا هتصل بأبوكي وهو يتصرف

اتصلى بيه انتى عالموبايل وأنا أكلمه
زمانه عالقهوة

وفى قهوة المعلم حسنين
رن الموبايل بتاع عم حلاوة العنتبلى الجزار


****
نكمل الاسبوع القادم ان شاء الله

ياريت لو عجبتكم قولولى

[الفارس المصرى]

جميله يا دكتوره
يا ريت تكمل
انا على فكره بدور على باقى يوميات احمد ونور مش عارف انا اللى مش لاقيها
ولا انتى اللى نفضتى لينا
ولا ايه

[الدكتورة مها]

ميرسي على تشجيعك

وبخصوص اليوميات موجودة يا جميل وكل يوم فى حلقة بتنزل

[امل مصر]

ايه يا دكتور هو انتى يتحبى الفوازير اوى لازم الاسبوع الجاى طيب مينفعش كمان يومين

[الدكتورة مها]

هههههههههههههههههههههههههههه

فعلا باحب الفوازير جدا وهانت يا امل