[النسر الآمل]

إوعى تسمع كلام اللي يقول لك بطل سجاير، ده يبقى واد توتو وما يعرفش فوائد التدخين!

العلم دلوقتي أثبت بالدليل والبرهان فوائد التدخين التي نختصر أهمها فيما يلي:



التدخين يضفي عليك مظهر الرجولة.
إذا كنت حاسس إنك عيل ومنظرك ما يجيبش راجل أبداً، امسك سيجارة وانفخ في وش الخلق.. هيفتكروك راجل على طول!



التدخين ببطء وبتركيز يعطي إيحاء بأهميتك وعمق تفكيرك.
إذا كان الناس مستهيفين شخصيتك ومنتش مالي عينيهم، ولع سيجارة، اسحب كل نفس منها ببطء شديد وانفخه لفوق بعنطزة، الناس هيفتكروا إنك عقلية علمية معملية فذة! وهيبقى شكلك ولا لاكي لوك في زمانه!



تدخين السجاير علاج ممتاز لبطء التفكير.
إذا اتزنقت وذكائك مش ساعفك بتصرف سريع، ولع سيجارة! على ما تولع وتشد وتنفخ، بيكون ربنا فرجها وحتة الدهنة اللي جوه الجمجمة طلعت رد! وما حدش يلحق يحس إنك موحوس!



التدخين يجمع البنات الحلوة حواليك.
ويحوطوا سريرك كمان! ويقعدوا يتغزلوا فيك ويقولوا لبعض: يا سلام لو كل العيانين اللي بيدخلوا لنا قسم الأمراض الصدرية شباب حلوين كدة!



التدخين يحافظ على صحتك من الأمراض المعدية.
طبعا، ما الدبان نفسه مش حيهوب ناحيتك وحيقرف من ريحة بقك!



التدخين يحافظ على مظهرك ويحميك من مشاكل الشيخوخة.
ما هو هيموتك قبل ما تلحق تشيب أو تصلع!



السيجارة يمكن أن تنقذ مستقبلك.
اسرق الخزنة وارمي السيجارة على الأرض قبل ما تخرج، إن الله حليم ستار.
ملحوظة: استعمل سجاير غير اللي انت متعود عليها علشان عقب السيجارة ما يجبش رجليك!

السيجارة تجعلك شخصاً متميزاً
طبعاَ، ما هو دوناً عن كل المخاليق انت الوحيداللي بتطلع غازات .. من بقك!



السيجارة تجعل منك شخصاً ذو بصمة لا تمحى من ذاكرة الناس.
أي حتة تدخلها، الناس مش ممكن ينسوا انك شرفتها، وحتى اللي دخلوا بعد خروجك حيعرفوا انك كنت موجود. من الريحة الـ ...



السيجارة تكسبك الاحترام.
أول ما تدخل حتة الناس تقوم واقفة على حيلها. ويروحوا جري يفتحوا الشبابيك!



التدخين يضفي عليك سيما الوقار والهدوء.
لو انت بتدخن من زمان وحاولت تمشي بسرعة أو تجري وتنط السلم زي العيال، حتنهج ونفسك يتكرش وحاتبقى حالتك تصعب على الكافر!



السيجارة بتهدي أعصابك لما تكون متغاظ.
هو صحيح في حاجات كتير ممكن تهدي الأعصاب زي الينسون أو الكركديه، بس شكلك بالسيجارة بيحسس الناس فعلاً إنك شايط وبتطلع دخان.



التدخين يحافظ على علاقتك بزوجتك.
انت بتفقد حالة التذوق تدريجياً فمش هتاخد بالك من طعم العك اللي مراتك بتطبخه وتوفر على نفسك البهدلة لو انت اتريقت على طبيخها!



ورغم كل الفوائد التي سبق ذكرها فإن للتدخين عيوباً لأنه بالتأكيد لكل شيء دنيوي عيوب ولكن عيوبه ضئيلة جداً وتافهة ولا قيمة لها وأقل من فوائده بكثير على عكس ما يقول أولئك الذين يدعونك إلى ترك التدخين وحتى تطمئن بالك فقد قررت أن أكتب لك بعض هذه الأضرار حتى ترى بنفسك أنها تافهة جداً جداً جداً ..



التدخين يسبب السرطان.
المادة التافهة التي أمامك توجد في دخان السجائر وتسبب مرض بسيط جداً اسمه السرطان (أعراضه زي شكة الدبوس) ومن هيافته انه عامل زي العيال الصغيرة وله أكتر من شكل فمنه سرطان الدم وده بسيط جداً وتكلفة علاجه بسيطه وما تصدقش اللي بيقولك انه ما يتعالجش لأنهم اكتشفوله علاج بس للأسف مش موجود اللا في أمريكا (بكره يوصل) ولو فرضنا انك مستعجل يا راجل خدلك تذكرة ايه يعنى ألفين ولا تلاتة وتمن علاجه رمزي جداً مش هيعدي مليونين ولا تلاتة، وفي نوع كمان اسمه سرطان الرئة وده بقى بسيط جداً وبتحس بعد فترة انك اتخلصت منه لأنك هتكون أصلاً مت وما فيش ميت بيحس بالألم فيها أي حاجة شوية السرطانات دي ..أبداً.



التدخين يسبب تليف الكبد.
اوعى تصدق اللي يقولك إن تليف الكبد ده يعني ان حالتك حرجة وانك هتموت في غضون أيام لا سمح الله .. ده اسم كدب انت مش حتموت في خلال أيام لأ في خلال اسبوعين يا راجل .. أيام ايه بعيد الشر.

[hamo81]

أسمحلي أضيف حاجة صغيرة

التدخين حرام شرعا

مشكور على الموضوع

تحياتي

[الحلم العربى]

شكرا اخى على الموضوع

[أسامة صلاح]

التدخين حرام شرعا

[النسر الآمل]

اولا جزاكم الله خيرا على مروركم
ثانيا نسيت هذا العيب الوحيد والمهم للتدخين وهو أنه حرام شرعا

شكرا اخوانى على التذكرة