خلص السكات...قَطْر الكلام قايم
يحيي اللي مات..ويفوق النايم
يرخي الستار..على أمسنا الغايم
يختم فصول..من قهر وهزايم
خلص السكات..
قَطْر الكلام قايم
****
خلص السكات ..وما عادش له معنى
مر الحياة..والقهر يمنعنا
كلمة نعم..ذلتنا في حياتنا
وهنموت بعار..لولم نقول لأه
****
خلص السكات..والعضّ على الشفايف
ظل الحيطان..ما عاد يغيث خايف
بان للعيان..والكل بات عارف
كم من جبان ..من دمنا غارف
لو خفنا منه زمان.. بقى مننا خايف
اوعاكم تقولوا الشعب مات
أو راضي بالمظالم
خلص السكات..
قَطْر الكلام قايم
****
خلص السكوت ..واتكلم العامل
حطم قيود..المارد الخامل
في موقعه وفي مصنعه..يقلق عدوه ويوجعه
صوت العنابر في المحلة..صار كل مصري بيسمعه
يغزل خيوط الأمنيات
ويجدل العزايم
خلص السكات..
قَطْر الكلام قايم
****
خلص السكات..واتكلم الفلاح
جذره في ارضه..وفي إيده فاسه سلاح
دي أرضنا..بختم العرق
بوجودنا..مش حبر و ورق
تصبح قبور..ولا تنسَرَق
أرضي وعرضي للممات
ما افوتها للظالم
خلص السكات..
قَطْر الكلام قايم
****
خلص السكات..واتكلموا الطلبه
تركوا الشاتات..والموضة والغلبة
انفتحت ساحات..للشاب والشابة
يمشوا الطريق..في رفاقة ومحبة
ماضي الحسام..ماتمنعه عقبه
ما احلى الولاد جنب البنات
ده بكره له نسايم
خلص السكات..
قَطْر الكلام قايم
****
خلص السكات...قَطْر الكلام واصل
إسمع هدير الإضرابات..هيلخص الحاصل:
اصحى يا مصري من كل مله..قول حي على العصيان
اصنع مناجل من الأهلةوسيوف من الصلبان
فوقوا يا فقرا في بر مصر..يانوبي ياعُربان
قصتنا قهر وجوع وفقر..مش لون ولا أديان
****
خلص السكات..
خلص الكلام
المواضيع المتشابهه 
العرض العادي
