[بقايا حروف]

ديوان حدوتة تاْليف والدى الله يرحمه ... ديوان بالعامية المصرية بيحكى تاريخ مصر منذ عهد الفراعنة والى تولى الرئيس حسنى مبارك الحكم فى مصر


الزمان : بعد حرب 1967
المكان: بجوار الاهرامات

تخيلوا معى الصورة ...تقف شهرزاد مكبلة بالسلاسل وعلى عينيها غمامة .. تحكى ما حدث لها رافضة الهزيمة ...وهذه الحدوتة ليست تاْريخ ولكنها للتذكرة... وعندما تحكى شهرزاد لابد ان نستمع


فلاش باك



مش عارفة عدى قد ايه

يمكن شهور .. يمكن سنين ... يمكن دهور

هبت على ريح خريف
هبّت علىّ ريح خريف
جرّت وراها ريح هبوب
ساعات تهب من الشمال
ساعات .. بتيجى من الجنوب
وريح كتير متبعزقة
من كل ناحية
لو كنت نايمة ولاّ صاحية
صوتها ساكن فى الودان
وريح بايد ممدودة عايزة تحنى هامتى
لمّا جت مسّت كرامتى
حركت صمتى
وقلت لاْه ما بدّهاش
وانا عندى ايه غير الكرامة
قلت استنجد " بمنف "
بس خفت من الملامة
قلت استنجد " بطيبة "
خفت ليقولوا الكلام
فى الماضى خيبة
وغصب عنى لقيتنى
شقيت التاريخ
ونبشت جدران المعابد
شفت كام كاهن وعابد
قلت لابو الهول يقول
يحكى سره
يحكى عن كل اللى غمه واللى سرّه
واللى خانه واللى عرّه
واللى حبه واللى ضرّه
يصرخ يقول بالمفتشى
ولا يختشى
وان سكت فيه غيره شاهد
فيه اهرامات شاهدة على مجدى وعظمتى
ايام ولادى ما علموا العالم كرامتى
ايام ما كنتى يا منف بتشعى الحضارة
فيه مجد طيبة والعماير
فيه المعابد والادارة
انطق يا ابو الهول واحكى
احكيلى عن ايام زمان
احكيلى عن ايزيس
وعن اوزوريس
عن المجد اللى كان
عن المسلات اللى لسه
رافعة راسها فى السحاب
عن الولاد اللى اتفنوا
علشان اكون دايما
شباب
دلوقتى انا ماشية ف ضباب
حتى السما من غير نجوم
قوم يا احمس قوم
قوم يا احمس لجل يفهم
الرواه
ان الغزاة .... مهما ملكوا
يوم زمامى
او حرّقوا جنحات حمامى
او هدوا عشه من الغصون
او هدموا معبد آمون
عمرى ما ستسلم لغاصب
او دخيل
والتاريخ عندك دليل
قوم يا احمس لجل تعرف
ان هكسوس النهاردة
عملوا فرده
وكتفونى بالسلاسل والحديد
توبى لازق فوق ضلوعى
عمرى ما لبست الجديد
مد يا رمسيس ايديك
ولا انا هنت عليك
فز يالا من التابوت
شق السكوت
شوف سنين مرت علىّ
كالكابوس
كنت تركة للبطالمة والمجوس
اللى فوق راسى يدوس
واللى يقتل فى الولاد
لجل الفلوس
الكلام ده كان زمان
يوم ما جم عندى الرومان
وقبلهم كانوا اليونان
ناس كتير هدوا الحصون
جم علىّ من الصحارى
والبرارى
كات خطاهم فى الحوارى
تزيد مرارى
آه يا نارى

لما جه اسكندر المقدونى شاف دارى انزهل
شاف حضارة شاف ادارة شاف عمل
شاف معابد تزهل العالم باسره
شاف تاريخ ضارب جدوره فى الازل
لما جه اسكندر المقدونى راح معبد آمون
جاى عشان يضحك علىّ جى يضحك ع الدقون
لجل يتودد الىّ .. قام بنالى اسكندرية
حط بطليموس مكانه واختفى وزرع الطاعون

[بقايا حروف]

الحية

مرت الايام وقلت
بكره ... ينزاح الغمام
بكره نور الشمس
هيزيح الضلام
والحكاية بتبتدى .. بقصة غرام

كليوباترا .. كات جميلة وبنت شاطرة
سحرها آسر قلوب كل الاباطرة
بس بتحب المخاطرة والمجون
واللى شاهد ... قيصرون
يلعنك يا كليوباترا
لما انطونيو هواكى
كنت ليه بتعشقيه ؟!
ساب بلاده وجه وراكى
حلوة .. آآآه .. زى القمر
بس لو عقلك هداكى
ليه تموتى بسم حية ؟!
جبتى خية فوق رقبتى
ورحتى موتى
ليه يا انطونيو بتترك عرش روما؟!
ليه بتعشق كليوباترا؟!
ليه تخلى اوكتافيو يجى ف اكتيوما؟!
ليه وليه!!!!!!!
انا ذنبى ايه!!!!!!!!
اكون مطية للرومان
والاباطرة يحكمونى
ويحرمونى م الامان
وانت يا ابو الهول مكانك
لسه ساكت
هز طولك وانسى صمتك
عرّف العالم كرامتك
ولاّ خايف م الاباطرة
ولا واقع فى غرام
الكليوباتره

[بقايا حروف]

نسيم الشرق


مرت الايام ويوم بصيت لفوق
يم الشروق
شفت ناس راكبة الخيول
وشايله راية
باين عليهم الهداية
انفتح قلبى لهم
لما انا بصيت لهم
حسيت بقلبى انهم
مش علىّ .. دول معايا
جم قوام .. نصبوا الخيام
حتى فوق ضهر الخيام
باض الحمام
وقبل ما يهل الصباح
تركوا السلاح
وقفوا صفوف خلف الامام
وصوت
آدااااااااااااااااااااان
وصوت ادان فى الودان بيهز وجدانى
الكلمة رنت فى قلبى بحس ربانى
مسحت ودنى عشان هايعيدها من تانى
حسيت بجسمى انتفض لما الآدان ادن
فروا الرومان م الآدان واحد ورا التانى
وعمرو ماسك لجام المهر بيمينه
نور الهداية رسم هالة على جبينه
كلمة وقالها .. وكل الخلق سامعينه
عيسى ومحمد سماحة مش خيانة وغدر
والقبطى حر وكل مصرى له دينه



يد واحدة

راية الاسلام فى قلبى اتصورت
والمحبة فوق جبينى نورت
قول نصارى ومسلمين
اهل ملة واهل دين
مية واحدة بيشربوها
نيل بيروى العطشانين
تلقى محمود جنب جورج
فى العمل متجمعين
الكنيسة جنب جامع
عاشوا دايما سالمين
صوت آدان رنة جرس
والجميع متوحدين
فى الحروب بتلاقى فيكتور
جنب حمدان واسماعين
والايدين عمالة تبنى
فى الصوامع والجوامع
ايد بتزرع بالعرق
شجر الزتون
ايد بتجمع فى اللمون
والتاريخ شاهد وسامع
لسه سيفك يا صلاح
فى القلعة لامع
يوم ما وحدت العرب
والدخيل فى دار شقيقتى القدس
سلّم وانضرب
والمعز اللى بنى فى قلبى لازهر
الف عام وشويه مرت
يمكن اكتر هوّ هوّ
قلعة للاسلام ومنبر

[لمياء سلام]

أولا أهلا و سهلا بالإبنة البارة
ثانيا ستٌنقل لملتقى القصيدة بالقسم العامي
ثالثا ألا ترين أنكِ نسيتِ ذكر أهم نقطة و هي إسم الوالد الكريم، أهو السيد: وهبة شتيوى؟؟؟

[بقايا حروف]

تمام استاذة لمياء نورتى الحدوتة .. ويا رب تعجب القراء ... فعلا والدى هو الشاعر وهبة شتيوى وانا هانقل لكم الديوان على فترات حتى لا يحدث ملل .. وبصراحة ماكنتش عارفة اكتبه فى اى قسم بالضبط ... وبعد ما انتهى من كتابة ديوان حدوتة بالكامل ساذكر آراء النقاد فى شعر والدى وتعليقاتهم على ديوان حدوتة

وصدر له ايضا ديوان ميت من الضحك ... وسانشره هنا ايضا ... وسانشر ايضا بعضا من قصائد شعراء مبدعين جدا ... لكن ما حال بينهم وبين الشهرة كونهم من شعراء الاقاليم ... وهذا لا يمنع انهم من الشعراء المبدعين ولديهم من الموهبة الكثير والكثير
انا اعتبر ذلك كله نوع من الوفاء لوالدى رحمه الله بنشر شعره وشعر كل احبائه وتلاميذه


مرة اخرى اشكرك شكرا جزيلا على تشريفك موضوعى ا. لمياء