يعني كان لازم تطاطي وتغسل الرجلين يا جون؟
يعني كان لازم يفيض بيك الكرم وتفيض بروحك ع الغيطان؟
يعني كان لازم تموت،
علشان افتح محارة قلبي عن كلمة حنان
مرة في العمر لمليونير من البيض الجبابرة الأمريكان
بس إنسان؟
آه لو الإنسان يشوف التاني إنسان قبل ما يفوت الأوان
آه وآه!
لعنة الله ع الحياة
لو تكون ستار ولازم يتمزع علشان ما بني آدم يبان!
رحمة الله ع الشرف
لو يكون نجمة شريف لابد يخرمها الرصاص
لجل يخرج م الرعاة راعي يبشر بالخلاص
وسلام الله علي جسد الشهيد
والوليد
اللي عمٌِدوه بدمه
وانتزع من حضن أمه
واترسم قديس عريس في روحانيات الزنوج.
جون يا جون يا بو الجراح،
جون يا جون نام في أمان،
شعلة الحرية وقعت ع التلوج،
في بحيرة متشيجان،
التلوج دابت، وبان اللولي والمرجان، وبان الكهرمان...
واشتراكي عربي، أفريقي، ناح،
وانتحب ع الساكسفون
مرة في عمر الزمان.
جون يا جون روحك مياه
بلورية، صافية، دافيه جايه من كل اتجاه،
زي ما تكون دمعه واحدة، كبيرة، قد الكون يا جون
يا يوحنا المعمدان.
ادكـــــــــــــــــــاوى
العرض العادي
