[حسام صقر]

بسم الله الرحمن الرحيم
_____________
القصه دى حصلت لى انا شخصيا وحبيت احكيهالكو علشان ناخد كلنا منها العبره والقصه كالاتى:

انا عندى سنترال فى محافظه القاهره وطبعا انا قاعد فاضى لانى باقضى الجيش فلما بنزل اجازه من الجيش بشتغل فيه وكان فى واحد عارفينه كلنا يعنى انا واخواتى وجيرانا ، يعنى كان بييجى يتكلم من السنترال عندنا هو ومراته وبيشترى كروت شحن وفى بينا تعامل يعنى وعارفين بعض ، المهم انا قاعد فى السنترال فى يوم من الايام لقيت الاخ ده جاى وجايب معاه شنطه سفر كبيره ودخل قعد جنبى بس بطريقه توحى انه جاى من سفر دلوقتى حالا وقلى فعلا انه لسه جى من المنوفيه حالا وانه كان بيجيب لحمه وسمنه وزبده وحاجات كتير من البلد لان مراته ووالدته لازم يجيبو الاكل من البلد لانه بيبقى بخيره واوهمنى ان الشنطه مليانه من خيرات ربنا بس انا ماكنتش اعرف قصده من كده وخت الكلام عادى خالص على انه دردشه عاديه ، وبعد شويه لقيته بيقولى انا سمعت ان فى عندكو عده بتبعوها هى لسه موجوده ولا ايه؟
قلتله اه موجوده هى عده اخويا بس مديهانى عشان معاييش عده لانى انت عارف ان الجيش بيحتاج مصاريف كتير فهو مخليها معايا.
قلى طب ممكن اشوفها ؟
قلتله اه طبعا.
المهم خد العده وقعد يتفرج عليها كانه هايشتريها يعنى وقلى ممكن احط الخط بتاعى فيها عشان اجرب الشبكه والسماعه؟
قلتله اه طبعا وانا بكلمه بحسن نيه خالص ومش حاطط اى خوانه من ناحيته ، قام مغير الشريحه وراح عمل نفسه كانه بيعمل مكالمه وقام واخد العده وجارى.
روحت اشوفه هنا وهنا مالقيتهوش خالص
بنشوف الشنطه اللى سايبها لقيناها فاضيه ومنفوخه بورق كارتون كده.
المهم اتاكدت ان انا اتنصب عليا وانه اخد العده وخلاص على كده ، روحت بيته لقيته نقل ومشى من البيت من شهر ولقيته كمان ناصب على زميل ليه فى نفس منطقته لكن زميله ده واخد منه البطاقه وفيها عنوان اهله او عنوانه هو القديم بس زميله خايف يروح المنطقه دى لانها منطقة مشهوره بالمخدرات والناس الحوش دول.
المهم خت منه انا البطاقه وعرفت العنوان واخدت زمايلى وروحت المكان ده لانى كنت اعرف منه ناس واول مانزلت المكان ده وماقابلش حد اساله على اخينا ده الا ويقولى دا سارق منى كذا وكذا ونبى لو عترت فيه تقولى ويدينى رقم تليفونه عشان اتصل بيه واللى سارق منه موتوسيكل واللى واخد منه خواتم دهب واللى واخد منه فساتين افراح وكلهم زمايله يعنى مش مخلى لحد مابقى معايا نوتة تليفونات من الناس اللى ناصب عليهم وكانى انا اللى مكلف بالقبض عليه ، سالت على حد من قرايبه ودونى لعمته قعدت تعيط وتقولى ونبى لوتلاقيه ينوبك ثواب فينا دا سارق موبايل ابنى وزميل ابنى كمان وامه جالها السكر من افعاله سفرناها البلد عشان ماتموتش وطلقنا مراته منه بالعافيه ومش لاقينه خالص ، قولتلها طب ايه سبب اللى بيعمله دا ياحاجه دا كان كويس معانا وعارفنا وعارفينه؟
قالتلى من شهر واحد بس بقى بيشم بودره وبيشرب مخدرات وباع عفش بيته كله على الموضوع ده ، ودا نصيبنا وهنعمل ايه؟
بصراحه انا قولت فى نفسى ربنا يهديه والحمد لله ان العده مش غاليه اوى وربنا يعوض عليا ورجعت على كده.
وبالظبط بعد تلت تيام لقيت باب البيت بيخبط ولقيت مرات النصاب ده هى اللى بتخبط لكن انا ماكنتش اعرفها اوى، قلتلها اتفضلى مين حضرتك؟
قلتلى انا مرات طارق.
قلتلها طارق مين؟
قلتلى طارق اللى سرق منكم العده من السنترال.
قلتلها اااااه وحضرتك عاوزه ايه؟
قالتلى عاوزه منك حاجه من الاتنين ياتسامحه ياهتصرفلك فى فلوس العده واجيبهالك.
قلتلها ليه كده هو فين الاستاذ طارق اللى نصب عليا؟
وبصراحه اول ماجاوبت على سؤالى انا جسمى قشعر وكنت هعيط والله.
قلتلى طارق توفى امبارح .
قلتلها ازاى الكلام ده ؟
قلتلى من البودره اللى بيشمها لقوه ميت واتصلو بينا روحنا استلمناه ودفناه وانا جايه عاوزاك تسامحه ربنا يخليك ولو عاوز الفلوس والله اجيبهالك وقعدت تعيط هى ووالدتها كانت معاها .
قلتلها مش هو طلقك قبل مايموت ؟
قلتلى اه بس انا ابقى بنت خالته.
والله ماكنت عارف اقولها ايه وكنت خايف يكونو بينصبو عليا هما كمان.
قلتلها خلاص انا كده كده كنت مسامحه اساسا لما عرفت انه ربنا ابتلاه بالمصيبه دى اللى اسمها البودره ودعيتله ربنا انه يهديه.
قلتلى انا متشكره ليك جدا ويارب يجعله فى ميزان حسناتك.
وبصراحه حبيت اتاكد بنفسى روحت فعلا فى منطقته لقيتهم عملين ليه عزا والناس كلها شافته والشرطه بتسلمه ليهم ساعتها بس قلت ياااااااااااااااه
الانسان عمره قصير للدرجه دى؟
من يومين كان بيعمل ايه وكان فين ودلوقتى فين
يارب احسن خاتمة المسلمين اجمعين يارب.

حبيت بس اقولكم القصه دى عشان نعتبر منها كلنا ونعرف ان الموت اقرب الى احدنا من شراك نعله.
والحمد لله رب العالمين.

[doaa32002]

اللهم احسن لنا الخاتمة

[fathyatta]

شَكر الله لََك

* فلتسامح أخى المسلم ولتستعوض حقك عند الله ..
فكل من يقرأ مقالتك يدعوا لك بالتعوض والخير والفضل
والبركة .فهذا جزء من تعويض الله فى الدنيا .
وستثاب لمن قرأ قصتك فوعاها فأخذ حِِذره..
ولكرم ربك .ورحمته جعل لهذا الشاب إنسانة مخلصة تدعو بالكفالة عنة لتخلصه من عذاب يوم عظيم .
وجزاك الله خيرا وبارك لله فيك
ولنحذر جميعا أن العمل هو الذى يبقى معنا فى القبر بعد أن يرجع أهله وماله.
اللهم إنا نسألك العفو و العافيةفى الدنيا والآخرة آمين
وآخر دعوانا أن الحمد لله رب العالمين .

FATHY ATTA

[حسام صقر]

[align=center]شكرا ليكى يادعاء واللهم تقبل منا دعاءنا يارب[/align]
[align=center]شكرا ليك فتحى [/align]
وفعلا انا اكتر شئ اتاثرت بيه فى الحكايه دى هى مراته اللى اكيد الراجل ده كان ظالمها معاه لكن هى مارديتش الاساءه والظلم باساءه مماثله ولكنها كانت على اتم استعداد انها تخلصه من الدين اللى عليه لعل الله يرحمه. [align=center]وشكرا ليك مره تانيه اخى فتحى[/align]

[fathyatta]

يارب إغفرلهذه الزوجه وزوجها ولمن سامحواودعوا لهما ولمن قرأ هذه المشاركه فوعاها

بارك الله فيك أخى / حسام و كل من فكر بعقله وبحسه الدينى وشاركنا الرأى لننتفع جميعا:
هذه القصة من وجهة نظرى لا تخرج عن

أربعة إحتمالات :
الأول : ربما الزوجان متفقان على دافع السرقة لِم الله أعلم .حتى ولو لم يكن هناك حل سِوى السرقة فالإثنان
آثمان ومشتركان فى الذنب .وبموت الزوج لامتها نفسها فأرادت التكفير عنها وزوجها والتخلص من المال الحرام بردّه إلى أهله هكذ كان تصرفها .
الثانى: ربما الزوجان ليس هذا فى طابعهم . طابع السرقة ولكن إغواء الشيطان لهما لسبب الله يعلمه .وكما فى أولا .
كان تصرف الزوجه فى ثانيا .
الثالث: الزوج يريد ذلك والزوجه تمنعه فلا يرتدع فأمره إلى الله وربك الأعز الأكرم .وزوجته تريد أن يغفر الله له فقامت بدور الكفيلة عن زوجها عسى الله أن يرحمه ويرحمها فربما أساءت له يوما ما .وجنتها عنده .
الرابع : الزوجة تريده -أى زوجها - أن يسرق والزوج يرفض وتحت ظرف ما أقنعته والشيطان معهما فاستجاب .
وكما فى أولا وثانيا كان تصرف الزوجة فى رابعا بعد الممات .
# فى كل الأحوال كان تصر ف الزوجه حسن ففى المعرو ف تعرضت واإلى الله توجهت وبقلب المؤمنة إهتدت ولزوجها أخلصت
اللهم تقبل عن الزوج فعل الزوجه هذا وسامحه يالله قدر رحمتك وعلى نية الأحياء الذين دعوا له وسامحوه .لا عليه .
وتب ياالله على العصاة والمذنبين وثبتنا على الحق المبين واهدنا وبنا الصراط الستقيم .

وصلى الله على سيدنا محمد وعلى أله وصحبه وســـــــــــــــلم

وآخر دعوانا أن الحمد لله رب
العالــــــــــــمين
FATHY ATTA