قــالوا الجواز ستر وغطا *** وقالوا الحـب نعمـه وهديـه
وقالـوا إنه عــزَّه وكرامة *** وقالوا إنـه مـوَدَّة عائليـه
لكن عجبى علـى بنت الناس *** في الحب تايهـه وملهيـه
في الدنيا صادفت نصيبهـا *** مع راجــل غاوى الأذيـه
فـي الصبـح يفـطرها بعلقـه *** والظهــر يغديها بروسيه
وبالليــل يقـوللها بحبـك *** بسرعة تنـسى الأسـيــه
وفـي الصبح تانى يضربها *** وبالليل تقـدِّمله الهـديـه
في البيت قاعـد ولا شغلـه *** وهي تـدِّيلــه الماهيه
ياخـذ فلوسـها ويطردهـا *** ويقـولها.. على أمـك ياوليه
رفعــت للنــاس شكوتها *** ودموعها حرقـت مديريـه
وقالت يامين منـه يخلصهـا *** بحق النبى ومقــام الأوليـه
سايقة عليكم أم هاشـم *** والحسين والبـدوى من الغربيــه
في المجلس إتلمـّت رجاله *** وهات وخد مـن العصريـه
حبيب القلب قـال برقـه *** سامحونى ورجَّعونـى لبدريـه
أبـدًا واللـه ماكان قصـدى *** دى حبيبتى وفرشتى الطريه
أنـا الغـلط فـوقى وتحـتى *** وخلاص تبت توبـه اَبـديـه
وكمان منين حصرف على نفسي *** ومين يأكَّلنـى فتـة ملوخيـه
ومزاجى العال إزاى يظــبط *** وحبيبــة القلــب مُشْ لِيَّه
قالتله سامحتـك ياروح قلبى *** وحشيتنى والله أيامـك الهنيه
ضربه ياناس كـان حـب ومعـزَّه *** وشـتايمه نوته موسـيقيـه
ولبيتهـا رجعـت فرحانه *** وفى جيبـه حطـت الماهيـه
وفـي الصبح فطرها بعـلقـه *** وفي الظهــر غـداها بروسيـه
________________________________________________
من ديوان شعر د. عاطف مختار
(كلمات ملضومة .. وحكايات منظومة)
العرض العادي
