جايزة ايه
جايزة ايه اللى اديتوهاله
هو فى حاجه لسه عملها
هى الجايزه لكلام قاله
ولا عشان طلته وجمالها
ولا الجايزه لخطبه قراها
فيه ناس تانيه كاتبينهاله
والمعنى المتخبى وراها
عمره ما ثانيه خطر على باله
ولا الجايزه عشان كام صوره
خدها وجنبه الست الاولى
وسط منصه او مقصوره
والناس يتصقف مذهوله
ولا الجايزه اكمنه مطنش
على ناس بيدبحوا ف ولادنا
ومادد ايده كمان ومكوش
على كل الثروات فى بلادنا
ولا الجايزه عشان كان قبله
واحد كان لامؤاخذه حمار
قام جه صاحبنا العالم قابله
وقالوا عليه فارس مغوار
عم نوبل قلقان فى التربه
م اللى بيحصل حوالين اسمه
قال فيه ناس ذمتهم شوربه
بيلغوصوا فيها ويبتسموا
دكتور
عادل عيد
العرض العادي
