[WebsiteDesigninEgypt]

هاي اصحابي

و الله الواحد مش عارف يبدأ منين بس علي قد ما الواحد بيحب مصر و مشتاق يرجع علي قد ما الواحد بيتحسر و الله

البلد هنا عكس مصر تماماً - و طبعاً المكسيك مش زي ما الاغلبيه متخيلين حصنه و كاوبوي و حركات

بالعكس بلد هاديه اينعم زحمه لكن منظمه فأستحاله تحس بالزحمه

البلد نضيفه بمعني نضيفه لو حد رما ورقه و لا عقب سجاره في الشارع يدفع 50 دولار غرامه

مفيش عربيات اقل من موديل 2000 تلاقيها ماشيه في الشارع علشان التلوث و لو البوليس وقف حد هنا معاه عربيه غير مطابقه للمواصفات أو بتضر البيئه من حقه يسحبها

كل ما اشوف نظام المرور هنا و ان كل ركن في عربيه او اتنين شرطه مرور افتكر امين الشرطه و لا العسكري اللي واقف في الأشاره

بالنسبه لأشارات المرور بقا تلاقيها في كل ركن من ناصية كل شارع و تلاقي اشاره عبور المشاه تقولك امتي تقدر تعدي و امتي لازم تقف ده طبعاً بمؤقت يقولك الاشاره هتقفل كمان كام دقيقه

بالرغم ان مصر اغني بلد في العالم حضاره و مناظر طبيعيه إلا انها للأسف مدفونه و مهمله

حاولت ادور علي شغل لكن الاجراءات صعبه علشان انا اجنبي عن البلد و علشان يشغلوا اجانب هنا مهماً كان جنسيته لازم يكون علي اعلي كفائه و لازم صاحب العمل يثبت انه اعلن عن الوظيفه دي و مفيش حد اتقدملها أو ان الموظف الاجنبي فيه مواصفات مش موجوده في المواطن و علي الرغم من كدا شرط اساسي تعلم المكسيكي برضه و الله حاجه تشرف ياريت بلدنا تبقي كدا مش هيكون في بطاله و لا الاجانب ياخدوا رزقنا
علي الرغم من كدا بحبك يا بلدي ووحشني ترابك بس ياريتك تبقي احسن
اخوكم محمد في المكسيك

نسيت احطلكم شويه صور للمكسيك هتلقوها في المرفقات

[Feeling Angel]

دى اخرة الكسل يحمادة الناس دى سابقانا بسنين يعنى مثلا عشان نبقى كدا مجتاجين مصر كلها تشتغل 50 سنة مثلا من غير كسل
انا قريت احصائية ان انتاجية الناس فى الشرق الاوسط معدلها نص ساعه فى اليوم
عايز ايه من ناس عايشة نص ساعه بس فى اليوم و الباقى الله اعلم همه فين ولا بيعملو ايه

بس شويه صور نظيفة دى شوارع عندكم؟؟؟ انا ممكن اخد مخدة و اجى انام على الارض هناك و هدومى مش هتتوسخ

[Feeling Angel]

الاول قولى انته قاعد هناك خلاص مش راجع مش كدا؟؟
لو كدا اعملك قسم رابطة المصريين فى المكسيك و تمسكها و يقدرو ساعتها اى مصريين يتواصلو مع بعض و تعرفو بعض هناك و تبقى انته المشرف على القسم ايه رأيك؟؟

[WebsiteDesigninEgypt]

لا يا صبراوي انا جاي تاني بأذن الله يوم 15 و بأذن الله انا نويت أطبق اللي اتعلمته هناك في بلدنا يعني مثلاً الاول كنت برمي ورق شيبسي و بسكويت في الشارع لكن دلوقتي خلاص احنا مش احسن منهم أنا هبدأ بنفسي لعل و عسي يكون الخير ان نبدأ بجد كلنا نعمل كدا و بالنسبه للمرور مش هتعدي الأشاره أبداَ علشان مكونش خطر لنفسي و اللي حواليا

بالنسبه للنوم في الشارع هههههههههه مينفعش علشان الجو هنا غريب قوي الصبح ممكن تلاقيه حر جداً جداً و بالليل تلاقي برق و رعد و مطر و شجر بيتحدف و حاجات كدا

بالنسبه للكسل علي قد ما في حاجات حلوه هنا علي قد ما برضه في كسل و ناس بتشحت في الشارع و اطفال بيشموا و رجاله لابسه لبس ستات علشان يستنوا الناس السكرانه و يضحكوا عليهم أو علشان يعزموهم علي حاجه و الكلام ده بس اغلبيه كبيره تلاقيها بتبتدي تتحرك من الساعه 5 الصبح كل واحد بيروح علي شغله و من الساعه 2 للساعه 4 دي فتره راحه لكل الموظفين تلاقي اللي بيروح بيته ياكل لقمه مع عياله و اللي بياكل برا و بعد 4 كل واحد يكون في مكتبه و يكمل شغله !!!!

بيتهيألي لازم نقف كلنا علشان حضاره 5000 سنه متبقاش نكته لما تقولها لأي حد في اي بلد

[Feeling Angel]

تيجى بالسلامة يباشا ان شاء الله و اتمنالك التوفيق من قلبي و متحرمناش من مشاركاتك