أسفخس 3
هجمة شرسة على فلوس المصريين الغلابة وياريت من النشالين بتوع زمان ، نشالين الأوتوبيسات والأسواق وياريت من البلطجية واللي لسة واقفين بالسنج والمطاوي قرن الغزال ولكن للأسف هجمة شرسة شيك بدأت من عدة سنوات مع ظهور القنوات الفضائية الخاصة والتي تتمتع بهامش كبير من الحرية وتدافع عن المظلومين وتوصل أصوات المساكين للمسئولين وتنقد و تلعن سنسفيل الصغير والكبير من الغفير لغاية الوزير واللي يرأس الوزير بس الأكبر من كده بيسموه النظام واستغلوا إعجابنا بالحرية وتوصيل مشاكلنا ووضعوا أيديهم في جيوبنا :
أولا: مسابقات هايفة أرباحها بآلاف الجنيهات وبعضها بآلاف الدولارات بس إتصل بـ ......09000 على أي تليفون أرضي أو من أي محمول .... 17 والدقيقة بجنيه ونصف واللي جرب الخدعة تكلفت المكالمة حوالي 50 جنيه ولك أن تتصور يا عزيزي القارئ أن تعداد المصريين 78 مليون واللي تحت الفقر 40 % فلو حسبنا اللي على خط الفقر واللي تحته بشويه واللي فوقه حبة يطلعوا حوالي 5 مليون وكلهم في أشد الحاجة لقيمة المسابقة وبعضهم يحلم بالفوز ليرى الكام ألف ويتحسسها بيده قبل ما يموت وهذا يعني أن المبلغ الذي يصل للقناة 250 مليون جنيه في كل مسابقة والقناة لا تكتفي بمسابقة واحدة ولكنها تخترع مسابقات ومسابقات ومسابقات مثل كورمبو ومين اللي دخل الجون وتوقعاتك بنتيجة المباراة وسنختارك لتحضر كاس العالم وسنختارك لبرنامج الخوف في الأرجنتين – وكأن مصر مفيهاش أماكن للهجص اللي بيعملوه – ورشح الفائز وأشكال وألوان ويبدو أنه تنظيم كعصابات المافيا بس لطيف وظريف فبدل ما نقتلهم وناخد فلوسهم لا نلاعبهم ونضحكهم ونمص دمهم وطبعاً معروف شركة الإتصالات المافيا التي تسمى 09000 و محمول 17 بتتقاسم الملايين من القنوات والمحزن والمؤسف أنهم في النهاية ومع ظهور نتيجة المسابقة يستخسروا يكسبوا واحد ولا إثنين من المساكين سكان خط الفقر ولكن يعلنوا أن الفائز محمد علي حسنين مصر القديمة أو رجب السيد عبد الدايم المنيا ولا فيه واحد إسمه محمد ولا فيه واحد اسمه رجب .
ثانياً : برامج جميلة إسمها فضفضة وفيه فضفضة مذاعة وفيه فضفضة من تحت لتحت بين المذيع والمتصل أو المتصلة وطبعاً أي كلام فاضي لا يودي ولا يجيب ويفضل المذيع يجرجرالمتصل في الكلام : وبعدين وأيه رأيك في المكالمة اللي فاتت ، طب وأيه رأيك في رأي محاسن اللي إتصلت إمبارح ويفضل المتصل المسكين يفضفض يفضفض لغاية ما تفضى جيوبه ويمكن ينام من غير عشا .
ثالثاً : إذا أردت أن تسمن إتصل – إذا أردت أن تنقص وزنك إتصل – إذا أردتي سيدتي معالجة أظافرك إتصلي – إذا أردتي تطويل شعرك ومعالجة تقصفه إتصلي – وإذا وإذا وإذا يعني مفيش حاجة ببلاش كدة .
الموضوع يا سادة يا كرام يا أبنائنا وجيراننا سكان خط الفقر ليست قنوات خاصة بل هي سبوبة كبيرة ولذلك نزل فيها رجال الأعمال بإيديهم ورجليهم وهي تربح يعتمد على النصب والإحتيال واستغلال فقر الناس وحاجة الناس وعوز الناس ولو هم وطنيون ويحملون هم هذا الشعب المسكين فيه خطوط مجانية اسمها 0800 ودي خطوط مجانية ويستطيع المتصل أن يشارك في المسابقات والمشاركات – نسيت رابعا المشاركات ولوحبيت تشارك بإيميل إنسى ما حدش حيسأل فيك لازم الخط الساخن – ويستطيع المتصل الفضفضة ببلاش وأتحداهم لو حولوا خطوط التسول بتاعتهم لـ 0800 المجانية ونسمن وننحف ونعالج أظافرنا وشعورنا ببلاش وندعيلكم .
وللأسف وللأسف ومن المحزن ومن المبكي ومن المزعج أن بعض القنوات الإسلامية وقعت في هذا المحظور وهي تحتوي علماء أفاضل ويعرفون شروط المسابقات الشرعية والتي لا يساهم فيها المتسابق بأي مليم وإلا صارت قمار وميسر .
أناشد الهيئات المختصة بجرائم المال أن تتكاتف مع الهيئات المختصة بالجرائم الإلكترونية مع الهيئة العامة للضرائب أن تكشف مافيا الإتصالات ومن وراءها من النصابين الجدد وتأخذ الدولة ضرائب هذه الأموال التي تقدر بالملايين وأتمنى أن تستولي عليها كلها لصالح سكان خط الفقر وأسفخس أسفخس أسفخس
العرض العادي
