عتاب لعبد الناصر فى ذكرى ثورة يوليو

الله يسامحك ياعبد الناصر
معرفتــش تــــرَبِّى أولادك
مشيت والشعب كان قاصر
ضـاع وضَيّــع كل أمجادك
الله يسامحك ياعبد الناصر
************
هو دا المجد اللى كنت تحلم بيه ..؟!
هو دا الأمل اللى ضيّعت عمرك فيه ..؟!
هو دا الشعب اللى كنت بتربِّيه ...؟!
ضايع ومش فاهم إن هو الخاسر
الله يسامحك ياعبد الناصر
**************
عناصر التقدم عندنا كلها موجوده
طاب ليه متخلفين وقدراتنا محدوده ..؟!
وليه كل الطرق قـدّامنا مسدوده ..؟!
و ليه مفيش نظر ومعانا كل العناصر..؟!
الله يسامحك ياعبد الناصر
**************
ماعلـّمْتنــاش إزاى نحافظ ع اللى باقى من كرامة
ولا علـّمْتنا إزاى نبقى وسط البشر مرفوعين الهامة
مشيت وسيبتنا نعانى وعايشـــين فى دوامــــة
وبقينا أكتر أمّه تايهه ف التاريخ المعاصر
الله يسامحك ياعبد الناصر
***************
شعب اليمن عايز يرجع زى ماكان يَمَـنين ... !!!
والسودان هيلاقيها ياربى منين ولا منيـن
والصومال بينــــازع بقاله سنين وسنين
وشعب غزه ياعينى اللى متحاصر
إنتَ السبب ياعبد الناصر
***************

كلام جميل يا نور
والمفروض يبقى فى شعر الأعضاء
أنت شاعر جميل جدا

اقتباس المشاركة الأصلية كتبت بواسطة أسامة صلاح كلام جميل يا نور والمفروض يبقى فى شعر الأعضاء أنت شاعر جميل جدا

شكرا أسامه على الرد والمجاملة
أنا فعلا "شاعر" بس بغصة من حالنا المتردّى.. وماكتبته ليس شعرا إنما هى مشاعر كل إنسان لا يرى من المستقبل إلا نفق مظلم .. والأصل فى الموضوع هو الرسم .. ورسمته عشان يفكر القراء " بأجمل " شهرين ف السنة .. شهر يونيه النكسة .. وشهر يوليو الوكسة
تحياتى

الزعيم مات من 40 سنة سيبوة في حاله واتحسروا علي حالنا الان الزعيم نصير الغلابة حاول ولكن مفرمة الاستعمار لم تتركة نحن الان عملاء بس البلد حالها ايه زفت طبعا ارقد في سلام يازعيم وفي معية الله ان شاء الله

جمال جميل كلامك بس مكانه فى منتدى الشعر اجمل