[أسامة صلاح]

[frame="13 98"]
كانت جدتي رحمة الله عليها
موسوعة
و كانت تحرص علي ان نتوضئ و نصلي قبل النوم
و تحكي لنا حكايات ننام في منتصفها هانئين بلا كوابيس
و كل هذه الحكايات داخلة في منظومة القيم الأصيلة
منها ما يغرز في النفس ان الله هو الرزاق و هو الموئل و الرجاء
و ان كل ما دونه سراب
منها ما يؤصل ان من والي ربه علي حق لا يضره شئ
منها ما يبين اخرة الشر الوخيمة و فضائل ان تكون طيبا
و منها ما يذكر بالفرق بين الطيبة و الهبل
و منها ما يؤصل ان من جد وجد و من زرع حصد
و منها ما يبين ان الكذب مردي لصاحبه و ان السرقة ليست من شيم الأحرار
و منها و منها
و اذكر الشاطر حسن و ست الحسن
و علي بابا
و ليلي و الذئب
و الثعلب المكار

كما كانت قصص التراث و التاريخ الاسلامي حاضرة
و كانت كل قصة مما أسلفت لا تبدأ الا بذكر الله
و الصلاة و السلام علي رسول الله
و كمان زيد النبي صلاة

و كنا ننام مطمئنين هانئين متوجهين الي الله



ممكن تحكى لنا حدوتة
يعنى لا تقل شكرا
ولكن قل
حدوتة حلوة سمعتها


شكر خاص لمن أوحت لى بالفكرة
أميرة البحر

-

وأنا حقول حدوتة


كان يا مكان ..
راجل طيب غلبان ، اسمه عم شعبان

الراجل كان مرتاح وشبعان ، فى حين كان الناس فى هذا الزمان ، يشكون من الغلب والهوان ..

الراجل بعد ماكبر ودار به الزمان ، حب يصاحب الثعلب المكار ، هو صحيح الثعلب لم يكن مكار ساعتها ، ولكن لما شاف عم شعبان ما بقاش له فى البتنجان ، و ساب الثعلب يلهو ويلعب وما فكرش فى السؤال عن الأحوال ولا المشاكل والأهوال ..

قال الثعلب لنفسه : انا لازم أملك زمام الأمور ..

وقعد زى الثعالب يلف ويدور ، لحد ما جات له فكرة جنان ، وقال للغلبان :
"ايه رأيك تبطل تكون قلقان ، وتسيبنى أحكم أنا البلاد واسيطر على الخلق والعباد ؟ ، وانت اتجوز والهى نفسك بالولاد والتعليم ، واديهم دروس ، واقعد ادفع فى الفلوس، و ماتنساش تجيب محمول ، وتكلمهم اول باول كده على طول ، و خلى بالك من اخبار الفنان فلان ، واللاعب علان بين كل حين وان.. عيش حياتك ودنيتك ، ومالك انت والحكم ده اصلا مش لعبتك .."

فجأة بص عم شعبان ، لقى نفسه بعد ما كان بيدفع فلوس تعليم و محمول ، مش عارف يجيب بيهم عيش ولا حتى فول ..

قعد الثعلب يضحك على شعبان ، ويقوله : "ده كله لمصلحتك يا غلبان ، ده لسه فى جاى كمان وكمان .."

و مرت الأيام والسنين ، لحد ما سافر الثعلب اللعين ، سويسرا وهاواى والكاريبى ، وأى مناطق نائية بعيدة عن العيون ، و بينما كان شعبان يندب حظه المأفون ، بص لقى الثعلب طالع فى التلفزيون ، يعيط زى المحترف ويقول :
"ما تتصوروش الغربة وحشة قد ايه يا جماعة ، انا نفسى اشوف بلدى ولو حتى ساعة"

و ياه عليك يا شعبان لسة قاعد فى بلدك حتى بعد ما بقت ملك لل....كان
[/frame]

[rasha R]

[align=center]والله بجد فكرة جميلة خالص ياسمسم انت واميرة بجد بشكركم عليها
اما الحدوتة اسمها السبع معزات والتعلب المكار
كان يامكان في قديم الزمان ما يحلى الكلام الا على ذكر النبي صلو على النبي "عليه الصلاة والسلام"وزيدوه كمان الصلاة عليه
كان في مرة سبع معزات وامهم ، امهم قالتلهم يا اولادي الحلوين انا رايحة على السوق وعايزاكو تقفلو الباب ورايا ومتفتحوش للتعلب المكار فقالولها حاضر ياماما
المهم امهم راحت السوق من هنا جاء التعلب من بعدها على البيت وخبط على الباب طق طق طق قالوا المعيز ميين قال التعلب افتحوا يا اولاد انا امكم فبصوا قالوا ده التعلب المكار فقالوا انت التعلب امنا صوتها ناعم مش زيك خشن راح التعلب اكل معلقة عسل وجه خبط على الباب طق طق طق قالوا مين : قال التعلب بصوت خفيف افتحوا يا اولاد انا امكم راحوا المعيز بصوا من تحت الباب لاقوا رجلين التعلب سودة وامهم بيضة فقالولوا انت مش امنا، انت التعلب المكار امنا رجليها بيضة وانت رجليك سودة راح التعلب جاب دقيق وحاطوا على نفسه وجه تاني مرة وخبط على الباب طق طق طق قالوا مين قالهم : افتحوا يااولاد انا امكم بردوا بصوا من تحت الباب لاقوا ذيله طويل فقالولو انت التعلب المكار وامنا ديلها مش طويل راح التعلب قص ديله وجه خبط على الباب طق طق طق قالوا مين قالهم افتحوا يا اولاد انا امكم فحسبوا الاولاد اللى هما المعيز انه التعلب امهم اول ما فتحوا الباب لاقوا التعلب قدمهم راحوا كلهم يستخبوا ، اول واحدة استخب تحت السرير والتانية ورا الباب والتالتة في الخزانة والرابعة في البتوجاز والخامسة تحت البطنية والسادسة في الكمودينو والسابعة الصغنونة استخب في الساعة المهم التعلب دور عليهم كلهم ولاقهم كلهم ماعادا الصغنونة اللى كانت في الساعة بعد كده جت الام فشافت البيت كله ملخبط ومالقتش حد من اولادها غير الصغيرة فقالتها ياماما ياماما التعلب المكار جه واكل كل اخواتي فقالتها امها هاتيلي طوبيتين(2 طوب) ومقص وابرة وخيط فراحت الام هي وبنتها الصغيرة يدورا على التعلب فلاقوه نايم جنب البير فراحت الام فتحت بطن التعلب بالمقص وطلعت كل اولادها وحطت الطوبتين وقفلت بطنه بالابرة والخيط ولما صحي التعلب لاقي بطنه ماليانه فكان عطشان فراح يشرب من البير ام وقع في البير ففرحوا المعزات وتوتة توتة خلصت الحدوتة حلوة ولا فتفوتة
هههههههههههههههههههههههههههههههه
دي احدى الحكايات اللى كانت ماما تقولها ليا ولاخواتي واحنا صغيرين ومازالت تقولها لاحفادها دلوقتي
انشاءالله تعجبكم وتصبحوا على الف خير

[/align]

[أسامة صلاح]

[align=center]
الف شكر حدوتة جميلة ومشاركة رائعة منك يا رشا


[/align]

[جوري]

[align=center]انا ماما ماكانت تقول ليه حكايه قبل النوم
بس بحب جدا انام في حضنها وتقعد تلعب بشعري لحد ما انام
لحد دلوقتي ،،،وانا في عمري هذا،،
كل ما اروح ازورها اخليها تعمل ليه الحركه دي
وتتذكر اني اتجوزت ،،وتقوم تقول ليه وبعدين معاكي
مش حتبطلي الحركات دي ،،
انتى خلاص صرتي ست متجوزه،،
هههههههههههههههههههههه
[/align]

[أسامة صلاح]

[align=center]
ههههههههههه بس انتى لسة نونو بردووووو ههههههههه تسلمى يا جورى بس لو سمحتى عايزين حدوتة من عندك
[/align]